عن اللعبة

آخر تحديث: 16 تشرين الأول 2026

الطريق

الطرق مرسومة من الخريطة الحقيقية: محمد القاسم، طريق المطار، الدورة، الطريق الغربي، والكاظمية. اللفّات والجسور والطلعات والمحطات بأماكنها، والبنايات والجوامع والنخل على جانبي الطريق مأخوذة من بيانات الخريطة، فلما توصل منطقة تعرفها.

بغداد مثل ما هي

• سيطرات طيّارة وثابتة: خفّف من بعيد، ولا تنسى حق الغدة؛ ولو دعمت الكونكريت تنحجز السيارة وتبدي المراجعات.
• أرتال (برلمان، جيش، حمايات) تفرض نفسها بالشارع: وخّر لها، لو لا.
• حفر وطسّات وخسفات ومي ورملة، وناس تعبر السريع بدون جسر مشاة.
• ماطورات وتكاتك تطلع من الصفحة، وإذا صار حادث: عطوة، عمامك، وجلسة فصل.
• الواسطة: تخابر واحد يعرف ناس… ومرّات ما يرد.
• بكل سفرة تظاهرة: خريجين يطالبون بالتعيين، كهرباء، عقود، ماي — لافتات وكتابات بخط الإيد، والشغب بالدروع وعجلات خراطيم الماي، وتايرات محروكة قاطعة الطريق.
• كتابات الحيطان والكونكريت: «باسم الدين باگونا الحرامية»، «وين الكهرباء؟»، وبوسترات المرشحين على أعمدة الجزرة، نصها مشخّط عليها؛ وعلى السياج والجزرة والمجسرات، ولوحات قوائم انتخابات ٢٠٢٥ على حديد ورا السياج.
• السيارة تعطل بالطريق: فيتر سيّار، دفّاعة الشباب، لو الونش.
• راديو السيارة: إذاعات عراقية مباشرة، فيروز الصبح، ريفيات ولطميات، وأغاني اللعبة الأصلية، ومحطتين صدريات وعطوانية؛ والفلاشة لأغانيك انت.

المصادر والحقوق

• بيانات الخريطة © مساهمو OpenStreetMap، مرخّصة بـ ODbL. شكل الطرق والبنايات ومحطات الطريق مبني عليها.
• حدود العراق على عملة الدينار من Natural Earth (ملكية عامة).
• الإذاعات تنبث مباشرة من خوادم أصحابها (راديو شفق، سومر، هوا دجلة، شناشيل، النخلة، الرشيد، بابل، المستقبل، الأوائل، فيروزيات، صوت الغد، إذاعة أم كلثوم، شيعة ٣١٣، إذاعة البلاد، إذاعة السراج، ريفيات، واحد عراق، صدى العراق). حقوق البث لأصحابها؛ اللعبة ما تخزن ولا تعيد بث أي صوت.
• الجنود والناس والسيارات والبنايات مولّدة بالكود داخل التعديل، مو مأخوذة جاهزة.
• الخطوط: Lalezar وBaloo Bhaijaan 2 وCairo وChanga وNoto Naskh Arabic (رخصة SIL OFL).

تنبيه

اللعبة ساخرة. كل الشخصيات والأسماء والأحداث خيالية، وأسماء المرشحين على البوسترات مخترعة؛ ما تمثّل أي جهة رسمية أو حزب أو عشيرة أو شخص.

العب هسه