شلون تلعب
تبدي شلون
من الرئيسية اختار طريقة اللعب: «دوام» أو «تمشاية» أو «سابق الوكت». اختار السيارة والوكت والزحمة، وبعدين المشوار، ودوس «يلا نطلع».
السياقة
تختار اللي يريحك من الإعدادات: إيد وحدة، ميّل، سكّان، لو مسارات. أول مشوار يعلّمك اللف والبريك والنايترو خطوة خطوة.
قواعد بغداد
- السيطرة: تبيّن من بعيد. نزّل سرعتك قبلها بوكت؛ اللي يجي طاير يوگّفوه: اعتذر وغالباً يمشّوك، وإذا لا فحق الغدة (25 ألف بسيطرة الجيش، 50 ألف بالشرطة)، لو واسطة، لو تتعارك وياهم. ولو دعمت الحاجز أو الكونكريت: حجز وغرامة بالملايين وشهور مراجعات.
- الرتل: تسمع الصفارة وتشوف الضوايات بالمراية؟ وخّر لليمين. اللي يسد الطريق ينزلوله الحمايات: اعتذر وبوس راسه، لو طلّع هويتك وانطر لحد ما يعبر الرتل.
- الحفر والطسّات: شوف الشارع گدامك. الطسّة بسرعة تكسر السيارة.
- الماطورات والناس: يطلعون من الصفحة بدون ما يباوعون. دوس الهورن حتى ينتبهون، وخفّف.
- التظاهرات: بكل سفرة شي بالشارع: وقفة على جنب الطريق والشغب حاصريهم والسايد اليمين مسدود؛ تايرات محروكة قاطعة الطريق وكوة وحدة — عبّر منها على مهلك لو ترجمك الحجارة؛ لو اعتصام قاطع الطريق كله: توگف، وتنطر، لو تنزل تحچي وياهم، لو تعبر من الرصيف. ومرّات الشغب يفتحون الطريق بخراطيم الماي.
- الحادث: إذا دعمت واحد صارت عشاير: تخابر عمامك، لو الشيخ، وتروح للفصل.
- الواسطة: بالمواقف الصعبة تگدر تخابر واحد يعرف ناس. كل واسطة تحتاج وكت حتى ترد مرة لخ.
الدعمات والكراج
كل دعمة تنزّل حالة السيارة: وكالة، مصبوغة، سكراب. وإذا عطلت بالطريق المشوار ما يخلص: خابر فيتر سيّار (25 ألف، وكل مرة بنفس الطلعة أغلى) يمشّيها تمشية حال، لو خلّي الشباب يدفّعوها (ببلاش إذا اشتغلت)، لو اسحبها بالونش للبيت وتخلص الطلعة واللي طلّعته يبقى إلك. صلّحها وطوّرها بالكراج.
السايبة سيارتك من البداية وببلاش. وبغداد ما تنطرك تتعلم: من أول طلعة، وحتى بالتمرين، السيطرات والأرتال والناس والحفر كلها موجودة.
الفلوس
المشوار يدفع على الوصول والمهام. الغرامات والفصل والحجز تنقص منها، واللي ما تگدر تدفعه يبقى دين بذمتك للمشوار الجاي.
الراديو
زر الراديو يبدّل الإذاعة. الصبح فيروز، العصر أغاني عراقية، والليل طرب، وريفيات بكل وكت، ولطميات وإذاعة السراج بالمغرب والليل والفجر، وبيناتها أغاني اللعبة الأصلية. وبكل وكت محطتين: «صدريات» و«عطوانية» (ردح ومعزوفات أعراس)، أغنية ورا أغنية. الإذاعات تحتاج نت؛ ومن الإعدادات › الصوت تگدر تخليها بس موسيقى اللعبة.
الفلاشة
تريد أغانيك انت؟ حطها بالفلاشة مثل ما يسوي كل سايق كيّا: الإعدادات › الصوت › «حط أغاني بالفلاشة»، واختار الأغاني من موبايلك لو الكمبيوتر. السيارة تشغّلها بالطلعة عشوائي، كل أغنية مرة، وزر الراديو يعبّر الأغنية. تشتغل بدون نت.